Það var skrítin tilfinning að upplifa þá staðreynd að þurfa að senda ákall til annarra þjóða vegna ástandsins hér á landi. Slíkt neyðarkall er yfirleitt aldrei sent öðrum þjóðum nema þegar gríðarlegar náttúruhamfarir hafa átt sér stað í viðkomandi landi.

Hamfarir hafa átt sér stað hér á landi. Ákallið var til þeirra sem eru aflögufærir í Svíþjóð í gegnum sænska fjölmiðla sem heimsóttu Fjölskylduhjálp Íslands 28. mars og 6. apríl sl. þar sem ég upplýsti blaðamenn um aðstæður fátæks fólks hér á landi. Við höfum tekið á móti yfir sex tugum fjölmiðla alls staðar að úr heiminum sem hafa óskað eftir að fá að kynnast starfsemi Fjölskylduhjálpar Íslands.

Aldrei hef ég sent ákall til annarra þjóðlanda fyrr en nú og ekki að ástæðulausu. Ríkisvaldið mun líklega styrkja starfið um fjórar milljónir árið 2011 og Reykjavíkurborg styður starfið með 2,5 milljónum króna en af þeirri upphæð verður dregin húsaleiga í Eskihlíð 2-4 sem er í eigu borgarinnar. Þegar upp er staðið verður styrkur borgarinnar um 1,2 milljónir króna árið 2011. Við kaupum mánaðarlega matvæli fyrir fjórar til fimm milljónir með dyggri aðstoð einstaklinga og fyrirtækja í landinu.

Tilræði við heilsu og líf hluta þjóðarinnar
Ástandið er orðið skelfilegt fyrir þúsundir fjölskyldna sem búa við ömurlegan aðbúnað. Getum við horft upp á afskiptaleysi stjórnvalda á Íslandi og þeirra sem meira mega sín í þjóðfélaginu? Aðstæður í dag eru yfirþyrmandi. Yfir eitt þúsund fjölskyldur leita til Fjölskylduhjálpar Íslands vikulega eftir mataraðstoð. Fólk hefur ekki ráð á að leysa út nauðsynleg lyf sín, hvað þá að leita eftir tannlæknaþjónustu. Fólk dregur það að leita til heilsugæslunnar sökum peningaleysis. Eftir því sem lengra líður frá hruninu snertir ástand lítilmagnans í þjóðfélaginu æ færra fólk. Það er nefnilega svo auðvelt að fara í gegnum lífið á Íslandi án þess að kynnast fátæktinni. Það furðulega er að margir sem ólust upp við fátækt í eina tíð en eru í góðum efnum í dag láta sig engu skipta þær fjölmörgu fjölskyldur sem búa við lítið sem ekkert í okkar nútímaþjóðfélagi. Þeir hinir sömu hafa gleymt æsku sinni og uppruna. Hugsum til allra þeirra barna sem alast upp á Íslandi í dag við verulega kröpp kjör með ófyrirsjáanlegum afleiðingum. Við tökum á móti fjárstuðningi inn á reikning 101-26-66090.

Páskahátíðin er framundan og því er mikilvægt að þeir sem eru aflögufærir með hátíðarmat styðji okkur til að hjálpa skjólstæðingum Fjölskylduhjálpar Íslands, því þá langar líka að gera vel við sínar fjölskyldur eins og við öll viljum gera. Við þiggjum matvæli, notaðan og nýjan fatnað alla miðvikudaga.

Ásgerður Jóna Flosadóttir, formaður Fjölskylduhjálpar Íslands í Reykjavík, Akureyri og Reykjanesi og er í hópi hagsýnna húsmæðra.