Erilsamt hefur verið hjá lögreglunni á Seyðisfirði það sem af er vikunni. Á mánudag var unnið að undirbúningi flugverndaráætlunar fyrir Egilsstaðaflugvöll, sem var undanfari stærri æfingar og innleiðingar Neyðaráætlunar fyrir Egilsstaðaflugvöll. Æfingin sjálf fór síðan fram þriðjudaginn 6. september. Allir lykilaðilar í áætluninni tóku þátt í æfingunni, sem þótti takast með ágætum. Töluðu flestir þátttakendur um það á rýnifundi í lok æfingar að þeir hefðu dregið góðan lærdóm af æfingunni. Áætlunin mun verða uppfærð þegar skýrslur um æfinguna liggja fyrir frá hverjum viðbragðsaðila fyrir sig, segir í tilkynningu frá lögreglunni á Seyðisfirði.

Ferjan Norræna kom til Seyðisfjarðar þriðjudaginn 6. sept og er farin að fylgja vetraráætlun. Ekkert markvert gerðist við afgreiðslu hennar á þriðjudeginum. Við brottför þurfti lögreglan hins vegar að birta sektargerðir á hendur fjórum útlendingum sem höfðu gerst sekir um utanvegaakstur í umdæmi lögreglunnar á Húsavík. Þá þurfti að hafa afskipti af manni að beiðni lögreglunnar í Færeyjum. Ferjan sigldi svo skv. áætlun um kl. 20.00 á miðvikudaginn. Lögreglan á Seyðisfirði annast landamæraeftirlit á Seyðisfirði eftir því sem við á og aðstoðar tollgæsluna við tolleftirlit.

Að öðru leiti hefur vikan verið með hefðbundnu sniði. Þá eru helstu verkefnin að venju einkum fólgin í umferðareftirliti þar sem fylgst er með ökuhraða, bílbelta - og ljósanotkun og að almennt sé fylgt lögum og reglum sem um umferðina gilda.