Jón Gnarr, borgarstjóri í Reykjavík opnaði nýjan samráðsvettvang fyrir Reykvíkinga á netinu í Menningarmiðstöðinni Gerðubergi í gær. Vefurinn heitir Betri Reykjavík, www.betrireykjavik.is. Gunnlaugur Sigurðsson, sem var valinn Reykvíkingur ársins 2011, setti inn fyrstu hugmyndina á vefinn. Snýst hugmynd hans um að stofna sérstaka aðstöðu fyrir veggjakrotara þar sem þeir geta fengið útrás fyrir iðju sína undir leiðsögn.

Á Betri Reykjavík mun íbúum borgarinnar gefast tækifæri allan ársins hring til að setja fram hugmyndir sínar um málefni er varða þjónustu og rekstur Reykjavíkurborgar. Íbúar munu geta skoðað fram komnar hugmyndir annarra, stutt þær eða verið á móti þeim. Einnig er hægt að setja fram rök og umræðupunkta um hugmyndir á vefnum.

Reykjavíkurborg skuldbindur sig til að taka mánaðarlega fimm efstu hugmyndirnar af Betri Reykjavík til formlegrar meðferðar viðkomandi fagráða. Munu fagsvið borgarinnar síðan framkvæma samþykktar hugmyndir. Verður ferli hugmynda sýnilegt á vefnum.

Hugmyndir af Betri Reykjavík sem koma til framkvæmda verða ætíð kynntar sem lýðsprottnar hugmyndir enda eru hugmyndir sem koma fram á vefnum sameign borgarbúa.

Málaflokkar sem notendur geta skráð hugmyndir á eru ferðamál, framkvæmdir, frístundir og útivist, íþróttir, mannréttindi, menning og listir, menntamál, samgöngur, skipulagsmál, stjórnsýsla, umhverfismál og velferðarmál.

Mynd/www.reykjavik.is: Frá opnun vefsins Betri Reykjavík í Menningarmiðstöðinni í Gerðubergi í gær. Á myndinni eru meðal annarra Jón Gnarr,borgarstjóri og Gunnlaugur Sigurðsson, Reykvíkingur ársins sem setti inn fyrstu hugmyndina á nýja vefinn.