Mánudag og þriðjudag fór fram alþjóðleg skíðaráðstefna á vegum NASAA (North Atlantic Ski Area Association) á Sauðárkróki. Er þetta í annað sinn sem slík ráðstefna er haldin á Íslandi og kom að þessu sinni í hlut skíðadeildar Tindastóls að sjá um framkvæmd hennar. Sagt er frá þessu á vef sveitarfélagsins Skagafjarðar.

Formleg dagkrá stóð yfir dagana 8. og 9. ágúst en meðal atriða á fjölbreyttri dagskrá voru kynningar og umræður um skíðalyftur, uppbyggingu barnagarða, vindmyllur, aðgangsstýrikerfi, snjóframleiðslutæki og margt fleira.

Þátttakendur á ráðstefnunni voru ríflega 40 manns frá fimm þjóðlöndum, Austurríki, Ítalíu, Svíþjóð, Skotlandi og Íslandi. Tilgangur ráðstefnunnar var fyrst og fremst sá að deila og miðla upplýsingum á milli skíðasvæða með það að markmiði að efla þau og bæta.

Óformleg dagskrá ráðstefnunnar var síðastliðinn sunnudag en þá voru menn boðnir velkomnir að hætti Skagfirðinga með reiðtúr frá Sauðárkróki að Grettislaug á Reykjaströnd og fengu allir tækifæri á að skella sér í hina náttúrulegu og sögufrægu laug að útreið lokinni.