Sunnudaginn 16. október kl. 16 heldur Tríólógía tónleika í Selinu á Stokkalæk. Tríóið skipa þær Hallveig Rúnarsdóttir sópran, Sólveig Samúelsdóttir mezzósópran og Hrönn Þráinsdóttir píanóleikari. Tríólógía mun flytja úrval dúetta eftir tónskáldin, þar á meðal Mädchenlieder eftir Schumann sem ekki er oft flutt hér á landi. Tónleikarnir eru svonefndir landsbyggðartónleikar sem Félag íslenskra tónlistarmanna gengst fyrir með tilstyrk mennta- og menningarmálaráðueytisins. Veitingar verða á tónleikunum og eru miðapantanir í síma 4875512 og 8645870.

Dúettar Mendelsohns eru þekktari og eru vinsæl viðfangsefni söngnema enda einstaklega fagrir og léttir yfirbragðs. Sólveig mun svo flytja úrval af einsöngslögum Mendelssohns, þar á meðal hin frægu lög Auf flügeln des Gesanges og Neue Liebe. Hallveig mun hins vegar takast á við hinn stórkostlega ljóðaflokk Schumanns Frauenliebe und Leben sem er einn þekktast ljóðaflokkur sem saminn hefur verið fyrir kvenröddina.

Hallveig Rúnarsdóttir hóf söngnám hjá Sigurði Demetz árið 1991. Hún lauk 8. stigi frá Tónlistarskólanum í Reykjavík undir handleiðslu Rutar L. Magnússon 1998. Það sama ár hóf hún nám hjá Theresu E. Goble við Guildhall School of Music and Drama í London og útskrifaðist þaðan með láði sumarið 2001. Hallveig hefur nokkrum sinnum komið fram með Sinfóníuhljómsveit Íslands og hún hefur einnig sungið með Sinfóníuhljómsveit áhugamanna, kammersveitinni Aldavinum, kammerhópnum Caput, Kammersveit Hafnarfjarðar, Íslensku kammersveitinni og Jón Leifs Kammerata. Hallveig hefur komið fram sem einsöngvari víða um heim, er virkur óratóríusöngvari hér á landi og víðar og hefur einnig lagt áherslu á flutning barrokk- og endurreisnartónlistar. Hún er einn af stofnendum kammerhópsins Rinascente.   Hallveig hefur sérstaklega verið virk í flutningi nýrrar tónlistar og hefur frumflutt mörg ný íslensk verk, t.d. á Listahátíð í Reykjavík og á Sumartónleikum í Skálholti. Hallveig hefur einnig haldið fjölda einsöngstónleika á Íslandi undanfarin ár þar sem hún hefur lagt áherslu á ljóðasöng.   

Sólveig Samúelsdóttir mezzósópran er fædd á Akureyri en alin upp í Trollhättan í Svíþjóð, á Ísafirði og í Reykjavík. Hún stundaði píanónám frá 10 ára aldri hjá Sigríði Ragnarsdóttur við Tónlistarskólann á Ísafirði og söng jafnframt með kór skólans.  Er Sólveig var 16 ára gömul flutti hún frá Ísafirði til Reykjavíkur og hélt áfram píanónámi hjá Halldóri Haraldssyni við Tónlistarskólann í Reykjavík.  Einnig sótti hún einkatíma í píanóleik hjá Jónasi Sen einn vetur.  Sólveig hefur auk þess lokið stúdentsprófi frá Verzlunarskóla Íslands og sveinsprófi í tannsmíði frá Tannsmiðaskóla Íslands. Sólveig hóf söngnám við Söngskólann í Reykjavík 1997 og lauk þaðan 8. stigi 2002 undir handleiðslu Elísabetar F. Eiríksdóttur og Elínar Guðmundsdóttur.  Haustið 2002 hóf hún nám við Tónlistardeild Listaháskóla Íslands og lauk þaðan B. Mus. gráðu í söng 2005 og kennsluréttindanámi 2006. Aðalkennari hennar við LHÍ var Elísabet Erlingsdóttir. Sólveig hefur sótt ýmis námskeið í söngtækni og túlkun m.a. hjá Giovönnu Canetti, Galinu Pisarenko, Joy Mammen, Mark Wildman og Kiri Te Kanawa. Síðastliðinn vetur sótti hún einkatíma hjá Giovanna Canetti prófessor í Mílanó á Ítalíu. Sólveig var annar tveggja sigurvegara í sólistakeppni Sinfóníuhljómsveitar Íslands og Listaháskóla Íslands 2004 og kom fram sem einsöngvari með Sinfóníuhljómsveitinni á tónleikum í Háskólabíói  í janúar 2005. Hún hefur farið með nokkur hlutverk hjá Óperustúdíói Íslensku Óperunnar og komið reglulega fram sem einsöngvari á ýmsum tónleikum undanfarin ár.  Þá hefur Sólveig tekið þátt í flutningi á fjölmörgum kirkjulegum verkum.

Hrönn Þráinsdóttir píanóleikari hóf nám við Tónmenntaskólann í Reykjavík 7 ára gömul hjá Erlu Stefánsdóttur. Hún stundaði nám við Tónlistarskólann í Reykjavík á árunum 1991-1998 hjá Jónasi Ingimundarsyni og lauk þaðan burtfararprófi. Í Þýskalandi stundaði hún nám við tónlistarháskólann í Freiburg og lauk þaðan Diploma kennaraprófi með ljóðasöngsmeðleik sem aukafag vorið 2004. Kennarar hennar voru dr. Tibor Szasz prófessor í píanóleik og Hans-Peter Müller prófessor við ljóðasöngdeild. Að því loknu stundaði Hrönn nám við tónlistarháskólann í Stuttgart undir handleiðslu Cornelis Witthoefft prófessors þar sem hún lauk sumarið 2007 sérhæfðu Diploma námi við ljóðasöngdeild skólans. Hrönn hefur komið fram á tónleikum víða, m.a. í Þýskalandi, Austurríki, Ítalíu og á Íslandi, bæði sem einleikari, meðleikari og við flutning kammertónlistar. Hún hefur verið meðlimur kammersveitarinnar Ísafoldar frá árinu 2004 en sveitin hlaut íslensku tónlistarverðlaunin sem flytjandi ársins árið 2007. Hrönn er kennari við Söngskólann í Reykjavík.