Skráð atvinnuleysi í september 2011 var 6,6% að því er fram kemur á vef Vinnumálastofnunar. Að meðaltali voru 10.759 atvinnulausir í september og fækkaði atvinnulausum um 535 að meðaltali frá ágúst eða um 0,1 prósentustig. Körlum á atvinnuleysisskrá fækkaði um 249 að meðaltali og konum um 286. Atvinnulausum fækkaði um 379 á höfuðborgarsvæðinu og um 156 á landsbyggðinni. Atvinnuleysið var 7,6% á höfuðborgarsvæðinu en 4,9% á landsbyggðinni. Mest var það á Suðurnesjum 10,7%, en minnst á Norðurlandi vestra 2,1%. Atvinnuleysið var 6,4% meðal karla og 6,8% meðal kvenna.

Fjöldi atvinnulausra í lok mánaðar
Alls voru 11.487 manns atvinnulausir í lok september. Þeir sem voru atvinnulausir að fullu voru hins vegar 9.675. Fækkun atvinnulausra í lok septembermánaðar frá lokum ágúst nam 445, en 272 færri karlar voru á skrá  og 173 færri konur m.v.  ágústlok. Á landsbyggðinni fækkaði  um 88 og  um 357 á höfuðborgarsvæðinu.

Fjöldi þeirra sem hafa verið atvinnulausir lengur en 6 mánuði er nú 6.842 og fækkar um 686 frá lokumágúst  og er um 60% þeirra sem eru á atvinnuleysisskrá í lok september. Þeim sem verið hafa atvinnulausir í meira en eitt ár fækkar úr 4.645 í lok ágúst í 4.457 í september eða um 188.

Alls  voru 1.774 á aldrinum 16-24 ára atvinnulausir í lok  september  en  1.858 í lok  ágúst og  fækkar þeim um 84 frá ágústlokum og eru um 15,4% allra atvinnulausra í september. Í lok september 2010 var fjöldi atvinnulausra ungmenna 1.996.

Alls voru 222 laus störf  hjá vinnumiðlunum og í Starfatorgi í lok september, mest þjónustu  -afgreiðslu og sölustörf eða alls 62 og fækkar lausum störfum um 226 frá ágústlokum.    

Útlendingar á atvinnuleysisskrá
Alls voru 1.844 erlendir ríkisborgarar án atvinnu í lok september, þar af 1.074 Pólverjar eða um 58% þeirra útlendinga sem voru á skrá í lok  mánaðarins. Langflestir  atvinnulausra  erlendra ríkisborgara voru starfandi í byggingaiðnaði eða 364.

Samtals voru 1.532 af þeim sem voru skráðir atvinnulausir í lok september í hlutastörfum, þ.e. þeir sem eru í reglubundnum hlutastörfum eða með tilfallandi eða tímabundið starf á  síðasta skráningardegi í september. Þetta eru  um 13,3% af þeim sem voru skráðir atvinnulausir í lokseptember.

Af þeim  sem voru í hlutastörfum í lok  september voru 895 einstaklingar sem sóttu um atvinnuleysisbætur skv. lögum um minnkað starfshlutfall frá því í  nóvember 2008. Í  lok september voru 33 sjálfstætt starfandi skráðir á atvinnuleysisskrá vegna samdráttar í rekstri skv. áður nefndum lögum.Hópuppsagnir og gjaldþrot.

Í septembermánuði bárust Vinnumálastofnun 3  tilkynningar um hópuppsagnir þar sem 113 manns var sagt upp.  Alls fengu  60  launamenn greitt úr Ábyrgðarsjóði launa í september, þar af voru 30 starfandi í mannvirkjagerð.

Fjöldi í úrræðum í september
Alls voru 2.916 manns skráðir í sérstök úrræði hjá Vinnumálastofnun í september  skv. bráðabirgðatölum unnum úr frumskráningu í úrræði. Af þeim voru 1.479 karlar og 1.437 konur. Erlendir ríkisborgarar voru 412, eða um 14% þeirra sem eru í úrræðum.
Talsvert fleiri voru í úrræðum í september en mánuðina á undan og er fjölgun í öllum tegundum úrræða. Megin skýringin er þó fjölgun þeirra sem hefja nám á námssamningum, samtals voru 1.348 á slíkum samningum í september, þar af 991 í tengslum við átakið nám er vinnandi vegur. Um 440 manns tóku þátt í ýmis konar stuðningsnámskeiðum s.s.  starfsleitarnámskeiðum og ferilskrárgerð og önnur fjölmenn tegund úrræða er starfstengd vinnumarkaðsúrræði, þ.e. starfsþjálfun, reynsluráðning, átaksverkefni ofl., en um 420 manns voru í slíkum úrræðum í september.

Horfur á vinnumarkaði í október
Yfirleitt  byrjar árstíðasveifla að hafa áhrif til aukningar atvinnuleysis í október.  Í október 2010  var atvinnuleysi 7,5%, en  7,1% í  september 2010. Vinnumálastofnun  áætlar  að atvinnuleysið í  október 2011 aukist og  verði á bilinu 6,7% - 7%.

Mæling á skráðu atvinnuleysi
Í septembermánuði síðastliðnum voru skráðir 236.709 atvinnuleysisdagar á landinu öllu sem jafngildir því að 10.759 manns hafi að meðaltali verið atvinnulausir í mánuðinum. Mannafli á vinnumarkaði skv. áætlun Vinnumálastofnunar í september 2011 var 162.451. Mannaflinn byggist á mannfjölda 1. desember 2010 með tilliti til áætlaðrar atvinnuþátttöku á árinu 2011 og árstíðarsveiflu í atvinnuþátttöku. Skráð atvinnuleysi er mælt á þann veg að fjöldi atvinnuleysisdaga er umreiknaður í meðalfjölda einstaklinga, þar sem allir dagar í hverjum mánuði eru taldir nema laugardagar og sunnudagar og útkomunni deilt í áætlaðan mannafla á vinnumarkaði í hverjum mánuði.