Í kjölfar greinarinnar frá því í gær um vafaasama fjármálafortíð þeirra Hrannars B. Arnarsonar og Helga Hjörvars hefur uppljóstraranum borist fjöldi ábendinga um það sem heimildarmenn hafa sumir kallað "gjaldþrotasögu Hrannars og Hjörvars". Virðist þar sannast að eiga má von á ýmsu þegar gruggugt yfirborðið er gárað.

Svo virðist sem ekki færri en sex félög og fyrirtæki sem Hrannar B. Arnarson og Helgi Hjörvar hafa átt eða verið tengdir saman eða sitt í hvoru lagi hafi orðið gjaldþrota á liðnum árum. Stærst virðist hafa verið gjaldþrot félagsins Arnarson og Hjörvar sem þeir félagar áttu og ráku í sameiningu en kröfur í þrotbúið námu alls 66 milljónum króna árið 1998.

Samkvæmt upplýsingum uppljóstrarans voru í kröfunum í þrotabú félagsins nokkrar skuldir á vörslusköttum, m.a. virðisaukaskattur að upphæð tæplega 1,8 milljónir króna, tryggingagjald að upphæð rúmlega 332 þúsund krónur og opinber gjöld að upphæð rúmlega 2,2 milljónir frá gjaldheimtunni í Reykjavík. Alls höfðu Hrannar og Hjörvar því ekki staðið skil á a.m.k. 4 milljónum af vörslusköttum þegar félagið fór í þrot.

Heimildarmenn uppljóstrarans benda á að í lögum um virðisaukaskatt sé tekið hart á brotum á skilum þar sem þeir, sem stunda virðisaukaskattskyldan rekstur eru aðeins innheimtumenn skattsins fyrir ríkissjóð. Telja þeir að Hrannar og Hjörvar hafi sloppið nokkuð billega frá þessum skuldum sínum í ljósi þess. Hrannar náði nauðasamningum við kröfuhafa og virðist að lokum hafa greitt um 14 milljónir af þeim 66 sem gerðar voru kröfur um.

En gjaldþrotasögunni var þó ekki lokið, heldur virðast fimm önnur félög tengd Hrannari hafa orðið gjaldþrota á næstu þremur árum, eða á tímabilinu 1994-1997.

Í aðdraganda borgarstjórnarkosninganna 1998 tók Morgunblaðið þessa sögu saman. Þar segir að félögin fimm hafi verið

Aðföng hf. , sem úrskurðað var gjaldþrota 22. marz 1994. Skiptum lauk 6. febrúar 1995 með því að búið var eignalaust. Aðföng hf. var stofnað 31.12. 1991 og það var afskráð 6. febrúar 1995. Tilgangur með rekstrinum var "kaup aðfanga fyrir ýmis fyrirtæki og dreifing þeirra, lánastarfsemi, kaup og sala eigna og tilheyrandi rekstur þeirra".

VSKM hf. , sem úrskurðað var gjaldþrota 23. marz 1995. Skiptum lauk 15. júní 1995 með því að búið var eignalaust. Fyrirtækið er stofnað 31. desember 1991 og afskráð 15. júní 1995. Tilgangur með rekstri félagsins var "viðskiptamiðlun, bókhaldsþjónusta, skrifstofuþjónusta, innheimtustarfsemi, lánastarfsemi, kaup og sala eigna og tilheyrandi rekstur þeirra".

Markaðsmenn ehf. , þar sem gert var árangurslaust fjárnám vegna 5,6 milljóna króna hinn 24. nóvember 1994 og aftur 29. júlí 1996. Hrannar Björn er þar stjórnarformaður og prókúruhafi. Félagið er stofnað 31. ágúst 1992 og er tilgangur þess "rekstur sölumiðstöðvar, markaðsöflun og ráðgjöf. Allur annar skyldur rekstur, lánastarfsemi, kaup og sala eigna og tileyrandi rekstur þeirra".

Manntafl ehf. , þar sem Hrannar Björn er stjórnarformaður, en þar var gert árangurslaust fjárnám vegna 3,2 milljóna króna hinn 15. janúar 1997 að kröfu tollstjórans í Reykjavík. Félagið er stofnað 31. desember 1991 og er tilgangur þess "útgáfustarfsemi, mótshald og efling skákíþróttarinnar á Íslandi, lánastarfsemi, kaup og sala eigna og tilheyrandi rekstur þeirra".

Útgáfuþjónustan MM ehf. Þar var gert árangurslaust fjárnám 6. september 1994. Félagið er stofnað 31. desember 1991 og er tilgangur þess "að standa að vandaðri útgáfu á bókum, blöðum og tímaritum auk annarrar útgáfustarfsemi og annast ráðgjöf og þjónustu á sviði útgáfumála ýmiskonar. Rekstur fasteigna, lánastarfsemi og önnur eignaumsýsla telst einnig til markmiða félagsins." Þetta fyrirtæki hét áður Íslenska vörumiðlunin, en nafni þess hefur vrið breytt. Kennitalan er hin sama.

Morgunblaðið klykkir svo út með því að telja upp kröfurnar sem gerð hafi verið í félögin fimm:

Arnarsson og Hjörvar sf. 66 milljónir nauðasamningar, 20% = 13,2 milljónir greiddar.

Aðföng hf. 1,5 milljónir. Gjaldþrot ­ Búið eignalaust

VSKM hf. 5,4 milljónir. Gjaldþrot ­ Búið eignalaust.

Markaðsmenn ehf. 5,6 milljónir. Árangurslaust fjárnám.

Manntafl ehf. 3,2 milljónir. Árangurslaust fjárnám.

Útgáfuþjónustan MM ehf. Fjárhæð liggur ekki fyrir. Árangurslaust fjárnám.

Á þremur árum virðist Hrannari B. Arnarsyni því hafa tekist að skilja eftir sig slóð gjaldþrota þar sem skuldir námu tæplega 82 milljónum króna, eftir því sem heimildarmönnum uppljóstrarans reiknast til út frá opinberum heimildum. Uppljóstrarinn telur að hugsanlega ættu spunameistarar Samfylkingarinnar að beina sjónum að eigin heimalingum áður en þeir gagnrýna aðra.