Uppljóstrarinn hlustaði á forsætisráðherra gefa þingheimi skýrslu um efnahagslífið í morgun. Það er ljóst af skýrslunni að forsætisráðherra er vel lesin í klassískum heimsbókmenntum og hefur tekið sér til fyrirmyndar heimspeki Alviðru, lærimeistara Birtings.

Alviðra þessi taldi að allt miðaði til hins besta, sama hvað á bjátaði. Hversu illa sem þeim Birtingi gekk í leit að hinni fögru Kúnígúnd þreyttist Alviðra ekki á að þylja þessa speki ofan í lærisvein sinn.

Uppljóstraranum varð sérstaklega hugsað til þessa þegar forsætisráðherra fullyrti að "myndarlega hefði verið komið til móts við skulduga íbúðareigendur" að undanförnu. Því allt miðar jú til hins besta.

Uppljóstrarinn sér að þetta er auðvitað alveg rétt. Samtök fjármálafyrirtækja bentu enda á að 145 milljarðar af skuldum heimilanna hefðu verið felldar niður. Að vísu gleymdist að taka fram í tilkynningunni að 120 milljarðar af þessari upphæð voru leiðréttar vegna þess að gjaldeyrislán fjármálafyrirtækjanna voru dæmd ólögleg. En þá standa samt eftir heilir 25 milljarðar sem hafa verið leiðréttir af skuldum heimilanna svo að allt miðar jú til hins besta.

Að vísu hafa fyrrverandi eigendur og stjórnendur fjármálafyrirtækja og alls konar áhættufjárfestar og kúlulánaþegar fengið niðurfellda töluvert fleiri milljarða, svo hleypur á hundruðum, og erlendir kröfuhafar hafa fengið að maka krókinn á þeim niðurfærslum sem annars hefði mátt nýta til að koma til móts við skuldug heimili. En allir verða jú að fá eitthvað að bíta og brenna, svo allt miðar þetta til hins besta ekki satt?

Uppljóstrarinn minnist líka þess að eftir fjöldamótmæli við stefnuræðu forsætisráðherra 4. október 2010 lagðist ríkisstjórnin undir feld og leitaði að lausnum fyrir skuldug heimili. Og eftir mikla hrakningaferð undir feldinum sem dróst fram í næstu viku margar vikur í senn fann ríkisstjórnin sína Kúnígúnd, hina fögru 110% leið. Og allt var það sagt miða til hins besta.

En nú berast svo fréttir af því að með aukinni verðbólgu í kjölfar aðgerðaleysis vegna nýrra kjarasamninga og vegna vaxtahækkana Seðlabankanas sé nú farið fyrir 110% leiðinni á sama veg og fór fyrir hinni fögru Kúnígúnd. Fegurðin hefur runnið af henni og 110% hafa umbreyst í 130% og líklega hærra ef svo fer fram sem horfir.

En "komið hefur verið myndarlega til móts við skulduga íbúðareigendur", svo að allt hlýtur þetta því að miða til hins besta eða hvað? Nei. Forsætisráðherra hætti sem betur fer þessum söng í morgun og gaf út réttu skilaboðin til þegna sinna:

Allt miðar til hins allra besta í þessum allra besta heimi allra heima.

Uppljóstrarinn veltir því fyrir sér hvort forsætisráðherra hafi dottið í hug að það gæri verið góð hugmynd að rækta garðinn sinn...