Vinstri hreyfingin grænt framboð naut mikils fylgis fyrir síðustu kosningar og Steingrímur J. Sigfússon var sá stjórnmálamaður sem naut mest trausts meðal almennings. Frá 2009 hefur fylgi Vg hinsvegar fallið jafn hratt og kosningarloforðin hafa verið svikin. Framganga flokksins varðandi Evrópusambandsaðild, Icesave málið, velferðarbrúnna, skuldavanda heimilanna o.fl. hefur valdið því að nokkrir þingmenn og fjölmargir flokksmenn hafa yfirgefið hreyfinguna á þessum tíma.

Heimildarmenn uppljóstrarans hafa heyrt að mikil reiði sé vegna þess sem margir flokksmenn telja nýjustu kosningasvik flokksforystu Vg og því máli sé hvergi nærri lokið. Það mál sem um ræðir er árásirnar á Líbíu en forysta flokksins hefur verið á miklum flótta og ítrekað reynt að firra sig ábyrgð. Menntamálaráðherra skrifaði t.d. grein á vefritið Smuguna fyrir skömmu þar sem hún sagði að þrátt fyrir að Vg hefði þá stefnu að ráðast ekki á Líbíu og standa utan NATO þá væri staðan sú að Samfylkingin hefði aðra skoðun og að Vg yrði að sætta sig við að svo væri.

Heimildarmenn uppljóstrarans hafa fylgst vel með þessum vandræðagangi og hafa heyrt að þessi söguskýring flokksforystunnar hafi aukið enn á óánægju flokksmanna. Öllum sé ljóst að Samfylkingin hafi fengið sitt stærsta utanríkismál (ESB) í gegn þvert gegn stefnu Vinstri grænna og í þessu ljósi sé algerlega óásættanlegt að bera því við Samfylkingin sé ekki sammála VG í þessu máli og því sé ekkert hægt að gera.

Heimildarmenn uppljóstrarans innan Vinstri grænna óttast að þetta muni auka enn fylgistap flokksins. Einstaklingar sem lengi hafi starfað innan raða Vg hafi nú endanlega yfirgefið þetta sökkvandi skip, margir á mjög opinberan hátt, og menn spyrji sig hvort Vg hafi engan metnað til að standa við nokkurn hlut í utanríkisstefnu flokksins?