Það er altaf nokkuð stór frétt þegar einhver af stóru laxveiðiánum á Íslandi er sett í útboð. Veiðifélag Þverár í Borgarfirði hefur nú ákveðið að óska eftir tilboðum í veiðirétt á vatnasvæði sínu, en þar eru Þverá og Kjarará, ásamt Litlu Þverá. Núverandi leigutaki er Sporður ehf, en samningur þeirra rennur út í lok veiðitíma sumarið 2012.

Veiðifélagið lítur svo á að hver sá, sem hreppir hnossið, þurfi að vita af því með góðum fyrirvara, svo sölustarfsemi geti hafist í tæka tíð.  Því mun útboðið verða auglýst í dagblöðum nú um næstu helgi og stefnt er að því að opna tilboðin þann 1. nóvember.

Það er  "LEX Lögmannsstofa"  sem sér um afhendingu allra gagna og framkvæmd útboðsins. Allt frá hruninu 2008 hefur verð veiðileyfa hækkað mun minna en nemur almennum vísitöluhækkunum.  En nú í sumar virðist spurn eftir veiðileyfum vaxandi og án efa bíða mörg veiðifélög nokkuð spennt eftir niðurstöðum þessa útboðs.  Þær kunna að gefa tónin um verðbreytingar á næstunni.

Þverá fellur í Hvítá um það bil 50 kílómetra frá sjó. Hún á upptök sín í votlendi Tvídægru og Arnarvatnsheiðar og nýtur góðs af frjósemi vatnanna þar. Í þverá fellur Litla Þverá og veiðist lax í báðum ánum. Um Þverá sjálfa er gjarna talað sem tvær ár - Þverá og Kjarará.  Kjarará er efri hluti árinnar og að mestu fyrir ofan byggð. Hvor hluti um sig er rekinn sem sjálfstætt veiðivatn með sitt hvort veiðihúsið. Á báðum svæðum er nú eingöngu veitt á flugu.

Heimild: Landssamband veiðifélaga.